Warrka naga soo gaaraya Magaalada Mandheere ee Dalka Kiinya ayaa waxa ay sheegayaan in Subaxnimadii hore ee Saaka Qarax Miino oo sababay Khasaare isugu jira dhimasho iyo Dhawac  wuxuu ka dhacay Xadka kala qaybiya Labada Magaalo ee Beled Xaawo iyo Mandheera.

Qaraxaas oo ka dhacay Goob Bar Kontorool ah oo ay ku sugnaayeen Ciidamo ka mid ah Milateriga Dalka Kiinya oo halkaa u fariista si ay Cashuur uga qaadaan Dadka isaga gudbaya labada Magaalo.

Qaraxaas ayaa sida la sheegay waxaa kudhimatay afar ka tirsan Ciidankii Milateriga Kiinyaanka ahaa ee bartaas ku sugnaa iyadoona isla goobtaasi ay ku dhaawacmeen Siddee ka tirsanaa Ciidamadaas.

Askartii halkaa ku dhaawacan tay ayaa dhaawacooda loola cararay Isbitaalada Magaalada Nayroobi halkaasoo iminka lagu dabiibayo.

Warku wuxuu intaa ku daray in Qaraxaas oo ahaa  Nooca Miinada dhulka la geliyo uu subaxnimadii saaka uu halkaa ka qarxay xilli ciidanku ay halka aku sugnaayeen kana qaadayeen lacago Cashuur ah.

Qaraxaas kaddib ayaa Ciidamo halkaa la keenay  waxaa ay bilaabeen hawl galo kuwaasoo la sheegey in ay qab qabteen illaa Todobaatan Soomaali ah oo halkaa ku dhawaa kuwaasoo Xabsiga loo taxabay.

Ciidamada ayaa weli sii wada hawshoodii iygaoona baadi goob  ugu jira Ciddii ka danbeysey qaraxaas Saaka lal eegtay Ciidamada Kiinya oo halkaa saaka lagula beegsaday.

Xaaladda goobtas ayaa xiran iadoona dhaq dhaqaaqii iyo isu gudubkii Dadkii labada Magaalana uu hakad ku yimid.

Ma aha markii u horeeyay oo Qarax sidan oo kale ah lala beegsado Ciidamada Kiinya oo ku sugan gudaha Magaalada Mandheera.

Si kastaba Xaaladda ayaan iminka xasilooneyn iyadoona la arkayo dhaq dhaqaaq Fara badan oo Ciidamada Kiinyaanku halkaa ka wadaan iyagoona qab qabasho ku haya Soomaalida halkaa ku dhow.